Лука. Chapter 20

1 Еден ден кога го поучуваше народот во Храмот и го проповедаше Евангелието, пристапија првосвештениците и закониците со старешините,
2 и Му рекоа: 'Кажи ни со каква власт го правиш тоа? Или, Кој е тој што Ти ја даде таа власт?'
3 А Тој во одговор им рече: 'И Јас ќе ви поставам едно прашање, па одговорете ми:
4 Јовановото крштавање од небото ли беше или од луѓето?'
5 А тие расправаа меѓу себе, велејќи: 'Ако речеме: 'од небото', ќе ни рече: 'Зошто тогаш не му верувавте?'
6 Ако речеме: 'од луѓето', целиот народ ќе нè каменува, зашто е уверен дека Јован беше пророк',
7 па одговорија дека не знаат од каде е.
8 А Исус им рече: 'Ни Јас нема да ви кажам со каква власт го вршам ова.'
9 И почна да му ја раскажува на народот оваа споредба: 'Еден човек насади лозје и им го даде под наем на лозари, па си замина на подолго време.
10 А кога дојде време испрати свој слуга кај лозарите за да му дадат од плодовите на лозјето. Лозарите го натепаа и го испратија назад со празни раце.
11 И пак испрати друг слуга, а тие го натепаа и него, го посрамија и го испратија со празни раце.
12 Испрати и трет, а тие и него го ранија и го исфрлија.
13 Тогаш господарот на лозјето рече: 'Што да правам? Ќе го испратам својот милен син. Можеби ќе имаат почит спрема него.
14 А кога лозарите го видоа почнаа да се договараат меѓу себе: 'Овој е наследникот! Ајде да го убиеме, за да биде наследството наше!'
15 И го исфрлија надвор од лозејто и го убија. Што ќе им направи сопственикот на лозјето за стореното?
16 Ќе дојде и ќе ги погуби лозарите, а лозјето ќе им го даде на други.' А кога тие го чуја тоа, рекоа: 'Никако!'
17 А Тој ги погледна и рече: 'Тогаш, што значи ова што е напишано: 'Каменот што го отфрлија ѕидарите, стана темелен камен?
18 Секој, кој ќе падне на овој камен, ќе биде разбиен на парчиња, а врз кого ќе падне тој ќе го смачка.'
19 И закониците и првосвештениците гледаа во истиот час да Го фатат, но се плашеа од народот, зашто сфатија дека оваа споредба ја раскажа за нив.
20 И Го дебнеа, па Му испратија душкала кои се преправаа праведни, за да Го фатат за збор и да им го предадат на законот и на власта на управителот.
21 И Го прашаа, велејќи му: 'Учителе, знаеме дека право зборуваш и поучуваш; и не гледаш кој е кој, туку навистина поучуваш за Божјиот пат.
22 Дозволено ли е да му даваме данок на цезарот или не?'
23 Тој го сфати нивното лукавство и рече:
24 'Покажете ми денариј! Чиј лик и натпис се на него?' Тие рекоа: 'На цезарот!'
25 А Тој им рече: 'Тогаш, дајте му го цезаровото на цезарот, а Божјото на Бог!'
26 И не можеа да Го фатат за збор пред народот, па молкнаа, вчудовидени од Неговиот одговор.
27 Тогаш се приближија некои од садукеите, кои тврдеа дека нема воскресение, и Го прашаа, велејќи:
28 'Учителе, Мојсеј ни напиша: Ако некому му умре оженет брат, а е без деца, брат му нека ја земе жената и нека му подигне потомство на брата си.
29 Беа седуммина браќа. Првиот се ожени и умре без деца.
30 Тогаш ја зеде вториот,
31 па третиот, и така сите седуммина. И сите умреа и не оставија деца.
32 Најпосле умре и жената.
33 И така: при воскресението, чија жена ќе биде таа, зашто сите седуммина ја имале за жена?'
34 А Исус им одговори: 'Децата на овој век се женат и мажат,
35 а оние кои ќе бидат достојни да го придобијат оној век и воскресението од мртвите, ниту ќе се женат, ниту ќе се мажат.
36 Тие не ќе можат веќе ни да умрат, зашто се како ангелите, и Божји синови се, зашто се синови на воскресението.
37 А дека мртвите ќе станат, тоа и Мојсеј го кажа на местото кај грмушката, каде што Го нарече Господ: 'Бог на Авраам, Бог на Исак и Бог на Јаков.'
38 А Бог не е Бог на мртвите, туку на живите, зашто во Него сите се живи.'
39 А некои од закониците како одговор рекоа: 'Добро рече, Учителе!'
40 И не се осмелија веќе да Го прашаат за ништо друго.
41 Тогаш им рече: 'Зошто велат дека Христос е Давидов Син?
42 Зашто самиот Давид вели во свитокот на псалмите: 'Му рече Господ на мојот Господ: 'Седни од Мојата десна страна,
43 додека не ги соборам Твоите непријатели под нозете Твои!'
44 Значи, Давид Го нарекува Господ. Тогаш како Тој може да Му биде син?'
45 И додека целиот народ Го слушаше, Тој им рече на Своите ученици:
46 'Чувајте се од закониците, кои сакаат да одат во долги облеки, на кои им се мили поздравите по пазарите, почесните места во синагогите и челните места на гоштавките,
47 кои ги проголтуваат домовите на вдовиците, и се молат долго за да бидат видени. Тие ќе добијат поголема осуда! '